تعليق على ڤيديو : السعي المستميت للمعرفه الصوريه.

البوست ده تعليقا مني على نُقطه ذُكِرت فى ڤيديو بعنوان 001 - GCC - the tale، الڤيديو فى الحقيقه بيتكلم عن GCC ولكن شد انتباهي نقطه فعلقت عليها، والبوست ده سرد للتعليق ده مع اضافة بعض التفاصيل الآخرى.

شُكر

أولاً شكرا لحضرتك على الڤيديو الجميل ده، وبصراحه الواحد بيتبسط جدا انه يشوف حد او مجموعه من الناس عندها تطرق للتوبيكس دي بالشكل التفصيلي والجميل ده.. وشكرا لاقتراحات يوتيوب انها رشحتلي الڤيديو ده، لإن من خلاله عرفت ان حضرتك عندك سلسله جاريه بتتكلم عن ال Kernel Modules ودي بصراحه حاجه انا كنت بـ struggle كتير عشام الاقيلها محتوى مناسب اشوف من خلاله الموضوع ده بحكم اهتمامي بيه بشكل خاص كتوبيك عِلميه، وألقيت نظره عليه وفعلا شكرا لحضرتك على الشغل الجميل.. وعندي تعليق بسيط على نقطه ذُكرت فى البدايه بخصوص عقلية الناس هنا بخصوص المجال ده وايه مهم وايه لأ.

بداية التعليق

كواحد لسه ف رحلته الجامعيه ف احنا عندنا افتقار لوضع الإهتمام على النقط اللى بتبني الأساسات لأي حاجه تانيه فرعيه.. ونقطه حضرتك ذكرتها فى البدايه عن ان الناس بوصلة اهتمامها بالامور مشوهه فتلاقي حضرتك بتتكلم فى بوست عن توبيك بعينها وتلاقيه مهتم بتوبيك تانيه خالص، وبيديها اهتمام بعيد كل البعد عن البوست ذات نفسه، وده بصراحه له شقين مهمين جدا سببهم فى المقام الاول إفتقار البيئه للمحتوى “المهم” ووضع النجاح السريع وعك الإيد فى اقرب فرصه ممكنه بأقل قدر ممكن من الكفاءه بعين الاعتبار على انه الاساس..

المقام التاني هو الشخص ذات نفسه، ولكن ده ابعاده أكبر بكتير لانه نِتاج البيئه شِئنا ام أبينا.

الأبعاد (not mentioned in the main comment)

زي ما قلت فالبيئه هيا عامل مؤثر أساسي لكيفية التعامل مع المعلومه، عن طريقك انت نفسك بتبص للمعلومه بأي شكل، وبحُكم ان كلامي على البيئه اللى أنا شخصيا فيها فهتكلم عنها شخصياً خاض التجربه واعتبر نفسي كمثال وهسقطه على بقيت الناس عشان ليه لأ؟..

المسؤوليه التربويه للأهل

سواء اعتبرنا الجزء الاكبر من وقت الطفل بيتاخد فى البيت أو فى المدرسه والشارع، الا ان الاهل يُعتبرو العامل المحوري لكيف يتعامل الطفل مع ما يواجهه فى المكانين.. فطبيعة الاهل ورصدهم للمشكله والتعامل معاها اول باول بحكمه ورشد، هيفصل في طبيعة استقبال الفرد (اللى هو الشخص بمراحله العُمريه) للمعرفه، فلو الأهل مأدوش دورهم فى ده بشكل كويس ده فهنا نيجي للمسؤوليه التانيه

المسؤوليه التربويه المؤسسيه

ودي تعتبر تاني اكبر عامل فى تكوين الصوره الى المفروض الفرد يبص من خلالها لنفسه، ثم المعلومه.

ونفسُه هنا لوحدها فيها تفصيل كبير، فلو الفرد (اللى فى الحاله دي الطفل) مقدرش يعرف نفسه ويقدرها بشكل سليم عمره ما هيكون عنده القدره انه يقدر المعلومه اللى قدامه بشكل سليم..

فأحيانا بيكون الشخص عنده المؤهلات الچينيه اللى تسمحله يكون متميز فى شيء ما، ولكن تعرضه لتشويه فى اي جانب من الجوانب دي حتما هيخليه إما عاش حياته كلها من غير ما يدرك ان عنده فرصه، او امه يستغنى عن الفرصه بمحض ارادته

المسؤوليه الفرديه

أحيانا الشخص بيخرج من كل ده باكبر قدر معرفي ممكن، ولكن ده معرفيا فقط، فتلاقيه عنده المعرفه، ولكن معندوش المبدأ، فيكون عنده المعلومه، بس مش قادر يوظفها صح..

والتوظيف هنا بيبقى منبعه شقين آخرين :

الأول - إما هو مش مقدر نفسه كويس، فبالتالي مستحيل يقدر المعلومه اللى معاه

التاني - انه يكون متربي على مبادئ مشوهه تخليه يطمس المعلومه بالرغم من معرفته التامه انه قادر على انه يطرحها طرح مؤثر على الناس اللى حواليه.

إستكمال الكومينت

اعرف كوادر وناس عندها المَلَكه العلميه انها تتكلم عن توبيك بتعقيد لا يقل عن دسامة المحتوى اللى بره، ولكن الناس دي إما بتدفن فى تراب المجتمع، إما مبادئهم بتخليهم يحتكرو المعلومه لنفسهم، ومبيدوهاش كامله، وده بيخلي المحتوى السريع فى مجال زي ال CS هو الرائد وكل ما بتتعمق فى التوبيك كل المحتوى الفعلي بيقل، وده مش محض صدفه، ده لان فعلا معندناش حد يقدم توبيك بالتعقيد ده، الا واما هو مبيطورش نفسه اول باول إما هو اولريدي بره البلد، او شخص مش لامس المشكله اصلا.

فتلاقي شخص بيتعامل مع مجال بتُقل ال CS على انه بيتمحور حول Tool زي لغات البرمجه، ومبيبقاش عنده تفكير نقدي لايه مهم بجد وايه لأ، ودايما الناس بتقف عن مرحله ما مبيعرفوش يتطورو فيها، فبالتالي السوق العربي بيبقى دسم بالناس اللى تحت مسمى مهندسين برمجيات ولكن فعليا محدش فيهم عنده فكره عن ماهية المجال.. وده لإن اقصى معلومه هياخدها بتقف عند اقل معلومه هو محتاج يبقى عارفها، فتلاقيه عارف C بس ميعرفش GCC لان مي دي التوبيك اللى اتصدرت انها مهمه، بس اللى اتصدر لغه زي بايثون لان الهدف مبقاش ايه المهم، بس بقى ايه اللى إحصائيا بيجيب فلوس.

خِتام

أسف على التطويل، واتمنى اكون وصلت مدى امتناني للمحتوى اللى حضرتك بتقدمه. شكرا ❤